Kalaallisut
Dansk
EnglishInuutissarsiutit
Aqqusinertaarnissap iluaqutissartai ullumikkut angallannikkut sipaarutissaanaanngillat. Aqqusinissarli aamma ima kinguneqartussaalluni, Sisimiut Kangerlussuullu akornanni nunataa inuutissarsiutitigut ineriartortitsinissamik periarfissarpassuarnik ammaasussaammat.
Taamaasillutik inuutissarsiutitigut ineriartortitsiviusut nutaanik periarfissaqalissapput, taamatullu inuutissarsiutit nutaarluinnaat aamma periarfissinneqalissallutik.
Inuutissarsiutit pioreersut nutaallu ineriartortinneri
Inuutissarsiutit ineriartorfiusut, aqqusinissamik iluaquteqartussat, soorlu makkununnga tunngasuusinnaapput isumalluutit uumassusillit, takornariaqarnerup ineriartortinnera kiisalu aatsitassarsiorneq /-piiaaneq. Isumalluutillu uumassusillit immamiittut nunamiittuullu, siunissami atorluarneqarnerusinnaassallutik.
Aalisakkat qaleruallillu nutaat Sisimiut Sarfannguillu eqqaaniit sinerissamiit nunakkut Kangerlussualiaanneqarsinnaassapput, tassanngaaniillu Europamut Amerikamullu Avannarlermukaanneqarlutik.
Tuttut pingaartumillu umimmaat ungalusaanngitsuni aqquserngup qanitaani uumasuutigineqalersinnaalissapput, tassanngaaniillu Sisimiuni imaluunniit Kangerlussuarmi toqoraavimmukaallugit.
Takornarissat Kalaallit Nunaanni sumiiffit marluk akornanni akikinnerusumik angalasinnaalissapput, taakkulu akornanni nunatanik misigisaqarluarnerulissallutik.
Tamakku saniatigut sermeq aajuitsoq Aqqutikitsoq, UNESCO-sitetut periarfissarlu Aasivissuit, takusassallu alinaatsut allat, tikikkuminarsissallutittaaq.
Aqqusinissap sinaani Kangerlussuarmut qanittumi aamma aatsitassanut marraq qammasissiaasinnaasoq, klinkiliaasinnaasoq, ussissaataasinnaasorlu, Sarfannguit eqqaanni sioqqat manngertut aqerluusassarlu kiisalu aqqusinissap sinaani arlalissuarni granitti ilaapput.
Qaqortorsuup eqqaani alimasinnerumaamiilluni anorthosit diamanti.
Inuutissarsiutitut periarfissat nutaat
Inuutissarsiutissanut nutaanut ilaapput Sermersuarmiit siku imerlu minguitsoq avammut niuerutaasinnaaneri kiisalu alumiiniunmik atiteriviliorsinnaaneq.
Sermersuup Kangerlussuullu akornanni aqqusinioreersumiit, kimmut aqqusinissakkut nutaakkut Sisimiut tungaannut Sermersuarmiit siku imerlu avammut niuerutinngorsinnaavoq.
Sermersuarmut ilisimasassarsiortut periarfissaat annertuumik pitsanngoriassapput, tassa Sermersuarmut atortussatik Sisimiut umiarsualivianniit ukioq kaajallallugu assartorneqalersinnaalerpata.
Misissueqqissaarnermi sunniutaasinnaasut kingunerisinnaasaat pillugt kapitali atuarniarukku una tooruk. [Qallunaatut]