Itillip oqaluttuassartaa

Nunaqarfimmiut nukittuut imminnullu napatissinnaasut
Ukiut 50-it matuma siorna Sisimiut Kommunea arfineq-pingasunik nunaqarfeqarsimavoq, matumani nunaqarfiit marluk suli najorneqartuni Itilleq ilanngullugu.

Naak 60-ikkut ingerlanerini eqiterisitsinikkut politikkeqarnermut atatillugu nunaqarfiup inuerutsinneqarnissaa siunertarineqarsimagaluartoq, suli nunaqarfik inoqarpoq.

Nunaqarfimmiut akiuussimanerisa kingunerisaanik nunaqarfik ullumikkut pitsaasumik atugaqarfiulluni ingerlavoq – taassuma saniatigut ukiut kingulliit ingerlanerini Kalaallit Nunaanni nunaqarfinnut allanut sanilliullugu innuttaasut amerliartorlutik.

Nunaqarfimmi pisiniarfik atortullu allat
Qanga KGH-jusimasoq (Kongelig Grønlandsk Handel) nunaqarfimmiippoq, tassanilu nunaqarfimmiut sanalugaat assassugaallu assigiinngitsut aamma nioqqutigineqartarlutik.

Taamatuttaaq anginngikkaluamik cafe-qarpoq, tassani sodavand-it, kaffi, mamakujuttut assigisaallu nioqqutigineqartarlutik, tamatumalu saniatigut pisiniarfik anginerusoq ”Pilersuisoq” ulluinnarni pisiarisartakkanik nioqquteqartartoq illuni. Taamatuttaaq 1989-imi sanaartorneqarsimalluni uffarfittalik, mersortarfittalik sanaluttarfittalillu kiffartuussivik ippoq.

Itillimi aamma nunaqarfimmi allaffeqarpoq, aalisakkanut tunitsiveqarpoq, meeqqeriveqarpoq, alloriarfinnullu pingasunut agguluttorneqarsimasumik meeqqanut atuarfeqarluni kiisalu minnerunngitsumik Knud Rasmussenip nunaqarfigisimasaanit Uummannatoqqamit 1962-imi nuunneqarsimasumit oqaluffeqarluni.

Itilleq nunap assingani
Qallunaat nunaanni udenrigsministerip Kalaallit Nunaannilu naalakkersuisut siulittaasuata suleqatigiinnissamik isumaqatigiissummik atsioqatigiinnerisigut naalagaaffeqatigiinnermi nunarsuaq tamakkerlugu nunap assinganut Itilleq ilanngunneqarpoq.

Taamatuttaaq Kalaallit Nunaanni naalakkersuisut siulittaasuat, savalimmiut lagtingsformand-iat qallunaat nunaatalu statsministeriat 2004-mi nunaqarfimmi naalagaaffeqatigiinnermi ataatsimeeqatigiipput.

Avataanut attaveqarluni qeqertarmiuuneq
Itilleq tarajoqanngitsumik imeqarfiunngitsumiilluni qeqertamiippoq, taamaattumillu ukiualuit matuma siorna tarajuiaatitalimmik imeqarfeqalerlutik. Siornatigut ikaartaammik umiatsiamilluunniit nunamut ikaarlutik imertariartarsimapput.

Itilleq aasat tamaasa sineriassorlutik takornariartaatinik tikinneqartarpoq, takornarissallu Kalaallit Nunaata silaanna pinngortitaalu innarlerneqarsimanngitsoq misigerusuttarpaat.

Sapaatip akunneranut ataasiarluni Sisimiuniit umiarsuaaraq Itillimut tikittarpoq. Aallarfissat akigititallu pillugit paasissutissat ersarinnerusut Royal Arctic Line-imut saaffiginnissuteqarnikkut pissariarineqarsinnaapput.

Oqarasuaatinut angallattakkanut oqarasuaatinullu napparussuit nunaqarfimmi napparneqarnikuupput, tamatumalu saniatigut Tele Greenland aqqutigalugu internetertoqarsinnaasarluni.

Uumap toqqarneratigut Itillimit assit takukkit

Itillimit oqaluttuarisaanermit assit uumap toqqarneratigut takukkit.