Sisimiuni Artek-imi aamma Danmarks Tekniske Universitet-iminngaanniit Ph.D-mut ilinniartut aasaanerani Safannguup Atuarfiani akeqanngitsumik najugaqarlutik Sarfannguup eqqaani misissuisarput, matumani ilaatigut Sisimiut Kangerlussuullu akornanni aqqusinissaq pillugu misissuisarlutik.

 

Tamatuma saniatigut Artek-ip aamma DTU-p nukinnik atuilluni issittumilu teknologimut tunngasunik ineriartortitsinerinut anorip sakkortussusaanik, seqineqassutsimik kiisalu sialoqassutsimik nittaalaqassutsimillu uuttuinernik nunaqarfimmiup ukioq tamaat ikiuisarput. Paasissutissat nunaqarfimmi uuttortaavimmit pissarsiarineqartarput, taakkulu qaammatit tamaasa DTU-mut nassiunneqartarlutik.

 

Nukissiorfiit suleqatigineqarnerat
Nunaqarfimmi atuarfiup pisortaata ataqatigiissaagaanik misileraalluni suliamut atatillugu nunaqarfimmit Nukissiorfiit qanimut suleqatigineqarput. Innaallagissamik imermillu atuinermut nammineq uuttuisartunik ikkussuisoqarnikuuvoq, qaammatillu pingasukkaartumik atuisimanermik Nukissiorfimmut paasissutissiisinnaasumik illut tamarmik nassitsissutilerneqarnikuupput.

Taamaasilluni nunaqarfimmiut tamarmik atuisimanertik internettikkut takusinnaasarpaat, atuisimanerminnillu annikillisitserusussinnaasunut tamanna iluaqutaaqaluni.

 

Ilaqutariit ataasiakkaat qanoq annertutigisumik atuisimanerminnik erseqqissumik paasisaqarsinnaaqqullugit, nunaqarfimmi ataqatigiissaarisoq atuisimanermik takussutissamik emailikkut aamma nassinneqartarpoq. Ilaqutariit atuisimanerminnik takussutissiamik pissarsiniartillutik atuarfimmut saaffiginnittarput, atuisimanermillu takussutissiap assilineratigut nunaqarfimmi tamarmi atuisimanermut sanilliullugu ataasiakkaat akiligassaat atuisimanerallu takuneqarsinnaasarlutik.