Atuarfik
Sarfannguit atuarfianni atuartut 27-iupput, ilinniartitsiviusunilu pingasuusuni alloriarfinnut pingasunut avitaallutik. Ilinniartitsisut pingasut ilinniartitsisorineqarput, ilinniartitsiviusullu saniisigut ilinniartitsisut inaajutigaluni perorsaanikkut sulliviutigisoq atuakkanik atorniartarfiulluni.

Kalaallit Nunaanni nunaqarfinnut allanut sanilliullugu immikkuullarissuulluni pitsaalluinnartumik ledningeqanngitsumik atuarfik internet-imut attaveqarpoq, atuartitsinerullu nalaani atuartut atorsinnaasaannik arfinilinnik angallattanik qarasaasiaqarluni. Qarasaasiamik atuinissamik atuartut ilinniartinneqartarput, qarasaasiallu angallattakkat taakku arfinillit Sarfannguup Atuarfianut qarasaasiaqarnikkut annertuumik iluaqutigineqarput, atuartullu amerlallussaat eqqarsaatigalugit naammallutik.

Ilinniartitsiviusuni marlunni pattagiaqarpoq, guitareqarpoq allanillu nipilersuuteqarluni, taakkulu atuartut taalliortarnerminni erinniortarnerminnilu atorluartarpaat, ilaatigullu atuartoqatiminnut, angajoqqaaminnut nunaqarfimmioqatiminnillu tusarnaartitsisarlutik.

Atuareernerup kingorna
Atuarnerup avataatigut atuartunut paaqqinnittarfeqarpoq, tassanilu atuartut sapaatip akunneranut ataasiarlutik assigiinngitsunik sammisaqarlutik kaagiliornermik iffiornermillu, assassornermik assigisaannilluunniit sammisaqartarlutik.

Unnukkut atuartitsinermut atuarfik aamma atorneqartarpoq, soqutiginninnerlu aallaavigalugu ukiuunerani pikkorissaanerit assigiinngitsut neqeroorutigineqartarlutik. Ilaatigut allattariarsornikkut pikkorissaqqinnissamut periarfissaasarpoq, ilaatigullu sanaluttartumik pikkorissaasulerluni tuttut umimmaallu nassuinit sanalunnermik pikkorissartoqarsinnaasarluni.

Maleruagassat
Malugisariaqartut ilagivaat Sarfannguup Atuarfia mamakujuttorfiunngimmat. Tamatuma saniatigut alloriarfinnut tamanut atuuttumik maleruagassaqarpoq, klassillu ataasiakkaat pisariaqartitaat aallaavigalugit ataavartumik maleruagassiortoqartarluni. Uumap toqqarneratigut ataatsimoortumik maleruagassat atuarsinnaavatit.