Innarluuteqarneq

Kommunemi innuttaasut assigalugit innarluutillit sapinngisamik nalinginnaasumik inuuneqarnissaminnut periarfissaqartinneqarnissaasa qulakkeerneqarnissaa Sisimiut Kommuneata anguniagaraa.

Peqataanikkut sunniuteqaqataaneq
Timikkut tarnikkulluunniit innarluuteqaruit, pisortanit ikiorserneqarnissamut tapersersorneqarnissamullu periarfissaqarputit, taamaakkaluartorli ilinnut ikiorsiissutigineqartuni nammineerlutit aamma tunniusimasuunissat ilisimassallugu pingaaruteqarpoq.

Ikiorsiissutinik tigooraaginnarnermit nammineerluni tunniusimasuuneq pitsaasumik kiffartuunneqarnissamut aqqutissiuussisarpoq, matumanimi illit tapersersuisussallu suleqatigiinnersi attaveqarnermik suleqatigiinnermillu aallaaveqassammat. Taamaaliornikkut aamma tapersersorneqarnivit pitsaassutsikkut inissisimalluarnissaa qulakkeerneqassaaq.

Innarluutilittut nalunaarsorneqarneq
Innarluutinnut atatillugu aningaasartuuternut ikiorserneqarnissarnut periarfissaqalersinnaanngorlutit, innarluutilittut pisortatigoortumik nalunaarsorneqarnissarnut periarfissaqartinniarlutit Sisimiut Kommunea Namminersornerullutik Oqartussanilu Ilaqutariinnut pisortaqarfik aaqqiissummik suleqatigiissuteqarput.

Innarluutilittut pisortatigoortumik nalunaarsorneqarniarnermi innarluutinnut atatillugu ulluinnarni annertunerusumik aningaasartuutinnut ikiorserneqarnissamik pisariaqartitsinerit nakorsamit kommunemilu sullissisumit nalilersorneqartarput, kingullertullu innarluutilittut nalunaarsorneqarnissamik neqeroorfigitinneq akuerigukku illit nammineerlutit atsiortussaallutit.

Innarluutilittut nalunaarsorneqarneq pillugu paasissutissat annertunerusut uumap toqqarneratigut pissarsiarisinnaavatit.

Pisortanit ikiorsiissutit
Innarluutilittut nalunaarsorneqarnissamik qinnuteqarsimatillugit itigartinneqarsimaguit, imaluunniit innarluutilittut nalunaarsorneqarnissamik neqeroorfigitissimanerit akuerinngikkukku, ulluinnarni ajornartorsiuternut atatillugu kommunemit ikiorserneqarnissamik, imaappoq pisortanit ikiorserneqarnissamik, aamma periarfissaqarputit.

Pisortanit ikiorsiissutisinissamut periarfissat pillugit paasissutissat annertunerusut uumap toqqarneratigut pissarsiarisinnaavatit.

Ilinnut tulluarsakkamik iliuusissatut pilersaarusiorneq
Tamatuma saniatigut pisuni tamani illit kommunemilu sullissisoq peqatigalugu iliuusissatut pilersaarusiortoqartarpoq. Iliuusissatut pilersaarut pillugu Ilaqutariinnut Pisortaqarfik ima allappoq:

”Innarluutillip kissaataa naapertorlugu periarfissaatillugulu periarfissagissaarluni ulluinnarni ptsaasumik atugaqarnissaata qulakkeerneqarnissaani iliuusissatut pilersaarut sakkussaavoq pingaaruteqartoq. Iliuusissatut pilersaarutitigut innarluutilimmut anguniagalersuisoqartarpoq, anguniakkallu anguneqarnissaannut sakkussanik ikiuutissanillu malittarisassiortoqartarluni”.

Ilinnut ikiorsiissutigineqartoq ilinnut naapertuuttussanngortikkumallugu iluaqutissanngortikkumallugulu nalinginnaasumik innarluutilinnut ulloq unnuarlu angerlarsimaffinni sulisut imaluunniit tapersersortit iliuusissatut pilersaarut ulluinnarni atortarpaat. Tapersersortit pillugit paasissutissat annertunerusut uumap toqqarneratigut pissarsiarisinnaavatit.

Paasissutissat annertunerusut
Innarluutillit assigiimmik periarfissaqartinneqarnissaat pillugu FN-ip politikkikkut anguniagaat Kalaallit Nunaanni atuuppoq, uumallu toqqarneratigut [qallunaatut] anguniakkat atuarsinnaavatit.

Innarluutilittut nalunaarsorneqarneq kiisalu pisortanit ikiorsiissutit pillugit inatsisit assigiinngitsut uumap toqqarneratigut atuarsinnaavatit

Tamatuma saniatigut siunnersorneqarnissamik ilitsersorneqarnissamillu pisariaqartitsiguit, Sisimiut Kommuneanut saaffiginnissuteqarnissarnut tikilluaqqusaajuaannarputit.