Kalaallisut
Dansk
English
Sarfannguit
Sarfannguit nunataat
Sarfannguit isumaqarpoq ”sarfartunnguit” taaguutaalu sarfartuuneranut inneruussisuupput, Sarfannguit Nunataata qeqertartaaniit - imaluunniit Sarfannguit nunataaniit, Amerlup Ikertuullu akornanni kangerluit akornanni ingerlaarfeqartut.
Asiariartarfimmiit nunaqarfimmut
Sarfannguit Sisimiut kangiatungaani 22 sømil ungasissusilimmi nunamut qanittumi qeqertami inissisimavoqj. Nunaqarfik 1843-imi saarullinnik aalisarnermut atugassanngorlugu pilersinneqarpoq, 1850-imilu asiartarfinngortinneqarpoq illutalerlugu, sulisunut inissialerlugu orsumillu suliarinnittarfilerlugu.
Oqaaseq asiariartarfik nunaqarfiit siusinnerusukkut nunarsuarmiit avinngarusimaasuneranut takussutissaavoq, kisianni ullutsinni Sarfannguit, Kalaallit Nunaanni nunaqarfiit allat assigalugit, nunaqarfeeraavoq imminut napatilluarsinnaasoq, nunarsuarmut allamut attaveqartortaaq annerusumik imaatigut aqqutit atorlugit.
Nunaqarfiup illui qalipaatigissut alianaatsumik inisisimapput, qaqqaq sinerlugu qummut siammarsimasut, imaq qulaallugu sivingasumi inissisimasut, ikerasak atikitsoq aqqusaarneqartussaalluni, nunamiit sarfannguup qeqertaanut pitinnak.
Kangerliumaneq ima atikitsigaaq, ilaatigut nunaqarfiup akianiittunut innuttaasut ilaannut nilliaannartoqarsinnaalluni, taava tamatuma kinguninngua nunaqarfimmut ingerlanneqassaatit.
Imaq isertitaqarfittut atorlugu
Nunaqarfimmi annerusumik aalisarneq inuutissarsiuutigineqarpoq, taakku nunaqarfimmi aalisakkerivimmi suliareqqaarneqartarput. Tassani saarullinnik, qeeqqanik, nipisaat suaannik suluppaakkanillu tunisassiortoqartarpoq, taakku tamatuma kingorna suliffeqarfimmit Arctic Green Food-imit assartorneqartarput.
Nunaqarfimmi innuttaasut amerlanertigut imaaneersunik aalisakkanik puisinillu aammalu nunaqarfiup eqqaani nunameersunik tuttunik umimmannillu imminnut pilersortuupput.
Arctic Circle Trail Village
KNI - Pilersuisoq nunaqarfimmi pisiniarfimmik ingerlatsisuuvoq, tassani taquassarsiniarsinnaavutit ulluinnarnilu nioqqutissanik pisisinnaallutit. Uani aamma pisummik angalasut, Kangerlussuarmiit Sisimiunut Arctic Circle Trail atorlugu pisuttut pisuffissamik sinneranut taquassaminnik pisiniarsinnaapput, aamma amerlasuunut Sarfannguaq uniffigilaassallugu pissanganartuuvoq, kujataatungaatigut pisuttunut, aqqutip atorneqarnerusup saniatigut.
Una toorneratigut Sarfannguit oqaluttuassartaaniit assinik takusaqarsinnaavutit.
Una toorneratigut Sarfannguit tamakkerlugu assingata siaartinneqarnera takusinnaavat.