Kuuit eqaloqarfiit

Kuuit takeqaat attorneqarsimanatillu, eqaluit angeqaat imerlu qillertuinnaalluni. Arctic Circle Region-imi eqalunniarnermi pissutsit qaffasinnerpaaffissaminiipput, aalisarnerullu narrutunerpaalluunniit iluarusutsissinnaavai.  

Naammanngitsutut isikkoqarpat, taava eqqanni qaqqat pissanganartuupput, sineriak angallavikkuminaatsoq peqqarniitsorlu, siuninniipporlu imaq attorneqanngitsoq kusanartunik kooqartoq.

Misigisassanut aqqut sumiiffimmi innuttaasut aqqusaaqqaartarpaat
Arctic Circle Region-iunimi imaappoq, qissattaaserluni imaluunniit aalisaammik aalisartoqarsinnaalluni, umimmaat, tuttut, nattorallit eqqannilu uumasut allat misiginissaanut piffissaqarluni inissaqarlunilu, aammalu inoqarfiusumiit ungasillutit pinngortitallu annertunerujussuanut qanittunnguullutit.

Kisianni nunaannarmi sumiiffiit eqqortut nassaarissagaanni sumiiffimmi ilisimasalik pisariaqarpoq. Kuunnut aqqutit sineriak sinerlugu ingerlasuupput, aamma nunap immikkoortuani angalaartitsisartunit tamaallaat Kalaallit Nunaanni kuunnut eqaloqarfiit pitsaanersaasa ilaannut ingerlanissamut ikiorneqarsinnaavutit.

Arctic Circle Region-imi sunngiffimmi aalisartutut misigissavatittaaq, nunap immikkoortuani najugaqarfiit sisamaasuni innuttaasut kuuit isaariaanni suli aalisartartut, soorlu ukiuni untritilinni taamaaliortarsimasut, aammalu aasilarneq tamanna sumiiffinni inuutaasut nunallu immikkoortuani kulturikkut oqaluttuarisaanera ingerlaannarnissaanut peqataapput.

Periarfissat amerlasoorpassuit
Arctic Circle Region-imut tikeraarninni aalisarnermut nutaraanersutit misilittagartuujunersutilluunniit apeqqutaanngilaq. Aalisarsinnaasunut tamanut kooqarpoq, kisianni naggataanut tamanut atuuppoq: Igitseriarnermi ataatsimi eqqortumi igitsinermi aalisagaq eqqortup pisarinissaata nuannissusia.

Nammineq toqqarsinnaavat imaanut qanittumi imaluunniit qaqqat sinerlugit ilorpasinnerusumut, kano atorlugu ipuinnarlutit tatsiniissinnaallutit aamma immaqa allamut sangulaarlutit tuttumik aallaannillutit unnukkut nerinissami akugineqarsinnaasumik. Nammineq suut aalisarniarnerlugit imaluunniit angallassisulerlutit aalisariarniaruit, taava Arctic Circle Region-imi periarfissaqarputit.  

Inuuneq naallugu pisoq
Inuuninni aalisarluni misigisaqarnissamut piareersimaviit? Taavami aallaannarit. Kisianni mianersorit, tassami kuuit ileqquninnarput, aamma oqaluttuassanik nuannersunik oqaluttuassaqarlutit utissaatit aamma sinnattorinngisaannarsimasannik nuannersunik misigisaqarsimallutit.